«Il Fatto Quotidiano»: Tirana në revoltë, studentët kërkojnë dorëheqjen e Ramës

TIRANË — Protestat e zhvilluara përpara Ministrisë së Arsimit, ku studentët kërkuan dorëheqjen e kryeministrit Edi Rama, janë pasqyruar në një shkrim të medias italiane «Il Fatto Quotidiano». Sipas artikullit, situata e tensionuar në Tiranë vijon prej muajsh, ndërsa përplasjet mes demonstruesve dhe forcave të rendit përfshinë hedhjen e gurëve e bombave molotov, si dhe kundërpërgjigjen e policisë me gaz lotsjellës e ujë.

Përleshjet zgjatën rreth tridhjetë minuta dhe marshimi vijoi drejt Kryeministrisë pavarësisht reshjeve të shiut. Të rinjtë refuzuan tentativën e opozitës së drejtuar nga Sali Berisha për t'iu bashkuar tubimit, duke krijuar një kordon dhe deklaruar se «Opozita jemi ne!». Pranë ministrisë u dislokuan forca të shumta policore, ndërkohë që qeveria ka parashikuar gjoba deri në pesë mijë e pesëqind euro për dhunën.