Drita mposht Vushtrrinë për fitoren e katërt radhazi në Superligë
Skuadra gjilanase ka shënuar fitore 3:1 ndaj Vushtrrisë në ndeshjen e vlefshme për javën e 12-të të Superligës së Kosovës në futboll.
Redaksia ZHURMA · · 1 min lexim
VUSHTRRI — Skuadra e Vushtrrisë është mposhtur me rezultatin 3:1 nga kampionia në fuqi, Drita, në takimin e zhvilluar në terrenin me bar sintetik në Gjilan. Për gjilanasit kjo është fitorja e katërt rresht në këtë edicion të Superligës së Kosovës në futboll, ndërsa seria e golave nisi në minutën e 19-të përmes Mike Arthur, i cili zhbllokoi shifrat. Futbollisti francez Kemelho Nguena dyfishoi epërsinë në minutën e 31-të, kurse Vushtrria arriti ta ngushtojë disavantazhin tri minuta para përfundimit të pjesës së parë me një supergol të realizuar nga Albion Shurdhiqi. Golin e qetësisë dhe të vulosjes së rezultatit përfundimtar e shënoi Albert Dabiqaj në minutën e 75-të.
Pas këtij takimi, Vushtrria mbetet në fund të renditjes tabelore me vetëm tri pikë të grumbulluara nga 12 ndeshje të zhvilluara, duke pësuar humbjen e katërt rresht, teksa më herët ishte regjistruar edhe një bojkotim i ndeshjes ndaj Ballkanit. Nga ana tjetër, Drita vazhdon rrugëtimin për mbrojtjen e titullit me 23 pikë të arkëtuara nga 11 ndeshje të luajtura deri më tani, duke pasur ende një ndeshje më pak të zhvilluar, atë ndaj Prishtinës.
