IA në shkollat e Kosovës: Qehaja kërkon strategji, jo pajisje

PRISHTINË — Inteligjenca artificiale ka hyrë në përditshmërinë e nxënësve në Kosovë, nga esetë e deri te detyrat e shtëpisë, por sistemi arsimor ende nuk e trajton këtë ndryshim si prioritet strategjik, vlerëson Rinor Qehaja, njohës i politikave arsimore dhe udhëheqës i institutit EdGuard.

Qehaja thotë se IA-ja nuk e dëmton domosdoshmërisht të menduarit kritik, por sfidon mënyrën tradicionale të mësimdhënies. "Janë detyrat mekanike të shtëpisë që po marrin përgjigje mekanike nga inteligjenca artificiale. Mësimdhënësit duhet të shkojnë përtej këtyre pritjeve", deklaroi ai. Ai propozon më pak detyra shtëpie dhe më shumë esejë e projekte të zhvilluara në prani të mësimdhënësit.

Sipas tij, digjitalizimi nuk duhet të reduktohet në tabela të mençura. "Është gjynah që një mësimdhënës ende të harxhojë orë të tëra duke kërkuar manualisht rezultatet e të nxënit, kur inteligjenca artificiale mund ta bëjë këtë me një prekje të vetme." Megjithatë, ai paralajmëron se pa qasje institucionale dhe trajnime serioze, përdorimi i IA-së do mbetet i rastësishëm. "Kemi nxënës që e përdorin inteligjencën artificiale në mënyrë brilante për hulumtim, por kemi edhe mësimdhënës që ende nuk e dinë çfarë është."

Qehaja shtoi se sfida më e madhe nuk është përdorimi i IA-së nga nxënësit, por koha që ata kalojnë në platforma online pa vlerë edukative.

Burim: Zëri
— Redaksia ZHURMA