Haziraj refuzon dorëzimin pas video-s në TikTok për plagosjen e Dardan Haxhijajt
Vezir Haziraj u shfaq në TikTok duke pretenduar se sistemi i drejtësisë bën padrejtësi pas incidentit me armë zjarri në Orroberdë.
ISTOG — I dyshuari kryesor për plagosjen me armë zjarri në fshatin Orroberdë të Istogut, Vezir Haziraj, është shfaqur publikisht përmes një videoje në rrjetin social TikTok, duke refuzuar të dorëzohet te organet e drejtësisë. Haziraj ndodhet në arrati pas incidentit të regjistruar mbrëmjen e së premtes, ku pas një mosmarrëveshjeje verbale dyshohet se qëlloi me armë zjarri ndaj Dardan Haxhijajt, rreth 34-vjeçar, duke e plagosur në pjesën e sipërme të këmbës së majtë.
Në paraqitjen e tij publike, i dyshuari ka folur rreth të kaluarës së tij gjyqësore dhe ka shprehur pakënaqësi të hapura ndaj sistemit të drejtësisë. Ai ka pretenduar se ndaj tij është ushtruar padrejtësi, duke krahasuar rastin e tij me vendime të kaluara gjyqësore dhe duke deklaruar se nuk do të dorëzohet. «Kur nuk ka drejtësi, unë e kom trunin tem, vazhdoj në atë temën time dhe nuk mundet me m’ndal kurrkush», është shprehur Haziraj në videon e publikuar nga arratia.
Rasti është konfirmuar nga autoritetet kompetente dhe me urdhër të Prokurorit të Shtetit është iniciuar zyrtarisht si vepër penale e klasifikuar si «Vrasje në tentativë». Policia e Kosovës po vazhdon kërkimet për kapjen e të dyshuarit, i cili ndërkohë vazhdon të sfidojë thirrjet për dorëzim përmes rrjeteve sociale.
Burim: Insajderi
— Redaksia ZHURMA