Hoxhaj: Rezultatet e PISA-s shpërfaqin dobësitë serioze në fushën e arsimit

Komisioni për Arsim dhe Shkencë ka organizuar diskutimin me temën «Sfidat dhe prioritetet në Arsimin Parauniversitar në Republikën e Kosovës», ku janë diskutuar problemet dhe sfidat me të cilat përballet sistemi arsimor në vend. Kryetari i Komisionit për Arsim dhe Shkencë, Enver Hoxhaj, tha se rezultatet e PISA-s shpërfaqin dobësitë serioze në fushën e arsimit.

Në këtë tryezë diskutimi u shqyrtua gjendja e arsimit parauniversitar dhe rrjedha e përgatitjeve institucionale. Pjesëmarrësit ngritën çështje që lidhen me vlerësimin e nxënësve, procesin mësimor dhe nivelin e përgatitjes së kuadrit arsimor në shkolla.

Kryetari i komisionit, Enver Hoxhaj, tha se deri më tani nuk ka pasur një debat të mirëfilltë për strategjinë e Ministrisë së Arsimit, Shkencës, Teknologjisë dhe Inovacionit. Hoxhaj përmendi si tema kryesore vlerësimin e nxënësve, rezultatet e testeve ndërkombëtare, tekstet shkollore dhe ndërlidhjen e arsimit me tregun e punës. Ai shtoi se cilësia në shkolla varet nga përgatitja, puna dhe pagesa e mësimdhënësve në klasa, ndërsa vuri në dukje se në përbërje të komisionit janë edhe dy ish-ministra arsimi, ish-drejtorë drejtorish komunale dhe intelektualë të fushës.

Nga ana e tij, zëvendësministri i Arsimit, Përparim Kryeziu, bëri të ditur se edukimi në fëmijërinë e hershme do të përbëjë një nga katër shtyllat kryesore të strategjisë së re të arsimit. Kryeziu deklaroi se ky stad është i rëndësishëm për zhvillimin socio-emocional të fëmijëve dhe për ngritjen e cilësisë arsimore në nivelet e mëvonshme shkollore. Zëvendësministri njoftoi se ministria do të ndjekë dy rrugë kryesore: zgjerimin e rrjetit të çerdheve publike dhe organizimeve të tjera, pasi studimet tregojnë se nxënësit që ndjekin çerdhet performojnë më mirë.