Si po ecën hetimi dhe identifikimi i 80 të zhdukurve të Ferizajt?

FERIZAJ — Rreth 80 persona nga rajoni i Ferizajt, që përfshin komunat e Ferizajt, Kaçanikut, Shtimes, Hanit të Elezit dhe Shtërpcës, ende figurojnë në listat e të zhdukurve. Pas 27 vitesh, hetimi dhe zbulimi i fatit të tyre vazhdojnë nëpër institucionet kosovare, edhe pse barra e kërkimit mbetet e rëndë për familjet.

Një dokumentar i realizuar për këtë rajon rikthen në kujtesë pasojat e luftës dhe përvojat e familjeve që vazhdojnë të përballen me mungesën dhe pasigurinë. Dokumentari sjell në vëmendje historitë e njerëzve që ende kërkojnë drejtësi dhe përgjigje nga institucionet.

Pas shfaqjes së dokumentarit u mbajt një panel diskutimi ku u trajtuan sfidat e procesit të zbardhjes. Në panel morën pjesë përfaqësues nga Prokuroria Speciale, Komisioni Qeveritar për Persona të Zhdukur, Instituti i Mjekësisë Ligjore, Shoqata Familjare për Personat e Zhdukur dhe Viktimat Civile, si dhe Qendra për Personat e Zhdukur.

Ilir Morina, prokurori i Prokurorisë Speciale, foli për ndryshimet institucionale dhe përpjekjet e bëra në vitet e fundit. "Prokuroria Speciale, hapi i parë që ka ndërmarrë në këtë drejtim është krijimi i institucioneve të rëndësishme të posaçme që merren me krimet e luftës në përgjithësi dhe me personat e pagjetur në veçanti," tha Morina.

Në Kosovë, mbetje mortore të viktimave janë zbuluar në më shumë se 2 mijë lokacione. Procesi i kërkimit, identifikimit dhe kthimit të mbetjeve te familjet vazhdon ende, ndërsa mijëra familjarë në Kosovë bartin pasojat e krimeve të luftës.

Përballë dhimbjes së familjeve që presin përgjigje, zbardhja e fatit të personave të zhdukur dhe sigurimi i përgjegjësisë për krimet e kryera mbeten sfida të mëdha. Përfaqësuesit institucionalë thonë se pavarësisht kalimit të kohës, procesi nuk ka përfunduar.

Komisioni Qeveritar për Persona të Zhdukur dhe institucionet e tjera vazhdojnë përpjekjet për drejtësi. Kërkimi për personat e zhdukur nga rajoni i Ferizajt mbetet prioritet, si pjesë e përpjekjeve më të gjera për drejtësi dhe kujtesë.

Burim: Kallxo
— Redaksia ZHURMA