Hekuran Murati beson në ndryshimin e qëndrimit të disa deputetëve të LDK-së

Deputeti i Lëvizja Vetëvendosje, Hekuran Murati, ka deklaruar se Kuvendi u konstituua në mungesë të një nënkryetari për shkak të refuzimit të grupit parlamentar të Partisë Demokratike të Kosovës për të propozuar kandidatin ose kandidaten e tyre për këtë pozitë. Sipas tij, ndonëse për javë të tëra kjo parti ka kërkuar konstituimin e Kuvendit, në ditën kur ai u konstitutua, ajo nuk ishte e pranishme në sallë.

Murati ka theksuar se subjekti i tyre mbetet i përkushtuar për zgjedhjen e presidentit. Ai ka shtuar se pas vendimit të LVV-së për votim të nënkryetarit nga Lidhja Demokratike e Kosovës, pritet të ketë një ndryshim të qëndrimit të disa deputetëve të kësaj partie lidhur me çështjen e presidentit.

Po ashtu, ai ka vlerësuar se nga këto veprime u dëshmua se sa seriozisht e kishte PDK-ja çështjen e konstitutimit të institucioneve.