Çfarë kërkon Haxhiu për të mbrojtur rininë nga kurthi i drogës?

PRISHTINË — Ushtruesja e detyrës së presidentes, Albulena Haxhiu, bëri thirrje për mobilizim të gjerë institucional dhe shoqëror në luftën kundër drogës, gjatë tryezës "Dita Ndërkombëtare kundër Abuzimit me Droga dhe Trafikimit të Paligjshëm". Ajo theksoi se abuzimi me narkotikë dhe trafikimi i tyre janë ndër rreziqet më serioze për rininë dhe sigurinë shoqërore në vend.

"Për drogat dhe pasojat e tyre duhet të flasim hapur, pa paragjykime dhe pa e fshehur rrezikun. Duhet të flasim në shkolla, me prindër, me mësimdhënës dhe me vetë të rinjtë, para se problemi të shfaqet në familje si krizë", tha Haxhiu.

Haxhiu theksoi shqetësimin për prezencën dhe shitjen e substancave narkotike në afërsi të shkollave. Sipas saj, parandalimi duhet të fillojë me informim të saktë, përfshirjen e prindërve dhe trajnim të stafit arsimor. "Nëse të rinjtë dëgjojnë për drogat vetëm nga rruga apo rrjetet sociale, institucionet nuk do të mund të ndikojnë mjaftueshëm", shtoi ajo.

Ajo theksoi nevojën për bashkëpunim ndërinstitucional — policia, institucionet shëndetësore dhe organizatat e trajtimit të varësive. Haxhiu veçoi organizatën "Labyrinth" si strukturë që, sipas saj, ka luajtur rol të rëndësishëm në trajtimin e personave me varësi dhe mbështetjen e familjeve të tyre.

Duke folur për qasjen ndaj personave të varur, Haxhiu theksoi se ata nuk duhet të trajtohen si kriminelë, por si individë që kanë nevojë për trajtim dhe rehabilitim. "Kriminel është ai që e shfrytëzon dobësinë e tyre, që i furnizon dhe i shtyn më thellë në varësi", tha ajo.

Haxhiu rikujtoi se Kosova ka tashmë Strategjinë Shtetërore Kundër Drogave 2024–2028, por theksoi se zbatimi i saj kërkon punë të vazhdueshme dhe koordinim institucional. "Kjo është thirrje për më shumë përgjegjësi dhe veprim. Ta mbrojmë rininë nga kurthi i drogës dhe shoqërinë nga krimi i organizuar", përfundoi ajo.

Burim: Zëri
— Redaksia ZHURMA