Haxhiu ndjek shfaqjen 'Qark i (pa)mbyllur burgjesh' në Gjilan
Shfaqja është një vepër dokumentare që sjell historinë dhe dinjitetin e shqiptarëve
GJILAN — Ushtruesja e detyrës së presidentes së Kosovës, Albulena Haxhiu, ka ndjekur në Teatrin e Qytetit të Gjilanit shfaqjen performative 'Qark i (pa)mbyllur burgjesh', e realizuar mbi dëshmitë dhe rrëfimet e Enver Dugollit dhe të burgosurve të tjerë shqiptarë. Haxhiu e cilësoi shfaqjen si një vepër të teatrit dokumentar që sjell në skenë historitë e qëndresës dhe dinjitetit të shqiptarëve gjatë viteve të fundit të okupimit dhe periudhës së luftës.
Sipas saj, dëshmitë e të burgosurve janë një kujtesë e gjallë për sakrificën dhe çmimin e lirisë. 'Kjo është një histori e sjellë përmes teatrit dokumentar, që na kujton se çfarë do të thotë të ruash dinjitetin edhe kur muret të rrethojnë dhe dhuna përpiqet ta shuajë zërin', ka shkruar Haxhiu.
Shfaqja u prezantua në kuadër të manifestimit 'Ditët e Mërgatës', që organizohet në Gjilan për të mirëpritur bashkatdhetarët gjatë sezonit veror.
Burim: KultPlus, https://kultplus.com/haxhiu-ndjek-shfaqjen-qark-i-pambyllur-burgjesh-ne-gjilan/
— Redaksia ZHURMA
