Haxhi Shala fiton padinë ndaj Ministrisë për mbrojtjen juridike

Ish-deputeti dhe një nga komandantët e UÇK-së, Haxhi Shala, ka fituar betejën ligjore kundër Ministrisë së Drejtësisë lidhur me një vendim të marrë nga ish-ministrja Albulena Haxhiu, e cila i kishte kufizuar mbrojtjen financiare në vetëm 1000 euro në muaj pasi ai ishte akuzuar nga Dhomat e Specializuara të Kosovës.

Konteksti i kësaj ngjarjeje daton nga koha kur Haxhi Shala u përball me akuza për administrim të drejtësisë, ndërsa ministria e atëhershme kishte ndryshuar rregulloret për financimin e mbrojtjes juridike përmes një udhëzimi të ri administrativ të vitit 2024, i cili zëvendësoi atë të vitit 2022 dhe kufizoi mbështetjen për rastet e krimeve të luftës dhe administrimit të drejtësisë.

Gjykata Administrative ka theksuar se marrëveshja e ofruar nga Ministria e Drejtësisë në shkurt të vitit 2024 ishte në kundërshtim të plotë me praktikat e kaluara për raste të ngjashme, duke përmendur rastin e Nasim Haradinajt, të cilit i ishin ndarë 81 mijë euro në muaj për avokatët, sipas vendimit që ka siguruar VOX Kosova. Sipas Gjykatës, në rastin e Shalës ishte dashur të zbatohej Udhëzimi Administrativ i vitit 2022, pasi kërkesa ishte bërë para se të hynte në fuqi udhëzimi i ri, ndërsa procedurat vlejnë nga momenti i ngritjes së aktakuzës më 6 dhjetor 2023.

Gjykata Administrative konstatoi përmes vendimit të marrë më 8 nëntor 2026 se «E paditura qëllimshëm nuk e ka trajtuar kërkesën konform Udhëzimit Administrativ nr.08/2022, sepse paditësi kërkesën për kompensim e ka ushtruar pranë të paditurës para se të hyjë në fuqi UA nr.01/2024, derisa ishte në fuqi UA nr.08/2022».

Në arsyetimin e vendimit të datës 29 shkurt 2024, me numër 43/2024, që kishte refuzuar ankesën e avokatit të paditësit, ministria kishte arsyetuar se Komisioni për Shqyrtim dhe Vendosje kishte vendosur pagesën prej 1000 eurosh në përputhje me udhëzimin e ri, ndërsa Gjykata vërtetoi se ky aplikim i rregullores ishte bërë në mënyrë të gabuar dhe të pabazuar.