“Harper’s Bazaar” i kushton artikull Dua Lipës dhe festivalit “Sunny Hill”
Revista amerikane vlerësoi stilin e këngëtares me veshje të markave Rabanne dhe Chloé, duke kujtuar edhe historinë e familjes së saj të emigruar në Londër.
PRISHTINË — Revista prestigjioze amerikane “Harper’s Bazaar” i ka kushtuar një artikull të veçantë Dua Lipës dhe “Sunny Hill Festival”, duke e vendosur Kosovën në qendër të vëmendjes së lexuesve ndërkombëtarë. Shkrimi i publikuar më 4 gusht nënvizon se këngëtarja solli industrinë e muzikës në Prishtinë për festivalin disaditor.
Revista e cilëson këngëtaren shqiptare si “mbretëresha e Sunny Hill Festival” dhe ndalet te paraqitjet e saj, duke vlerësuar stilin dhe zgjedhjet e veshjeve. Në natën e parë Dua Lipa u shfaq me një minifustan metalik të markës Rabanne, të zbukuruar me elemente lulesh, të cilin e kombinoi me çizme prej lëkure.
Në ditën pasuese të festivalit, ajo zgjodhi një stil më bohem duke veshur një kostum të bardhë prej dantelle të markës Chloé me supe të zbuluara. Më vonë këngëtarja i shtoi veshjes një xhaketë të kuqe dhe festoi së bashku me familjen e saj, duke tërhequr vëmendjen për pamjen e saj.
“Harper’s Bazaar” i kushton vëmendje edhe lidhjes së Dua Lipës me Kosovën, duke kujtuar se festivali u themelua në vitin 2018 nga këngëtarja dhe prindërit e saj. Prindërit e saj emigruan nga Kosova në Londër gjatë viteve ’90 dhe u rikthyen pas shpalljes së pavarësisë në vitin 2008.
Autorët theksojnë se këngëtarja ka kaluar një pjesë të fëmijërisë në Prishtinë dhe mban shtetësinë e Kosovës. Ajo ndau një mesazh emocionues pas festivalit, duke u shprehur se ndarja e kësaj nate me publikun në qytetin që e formësoi, e rrethuar me gëzim dhe krenari, ishte e vështirë të përshkruhej.
Burim: Ekonomia Online
— Redaksia ZHURMA
