Haradinaj: Rezultati zgjedhor kërkon bashkëvendimmarrje

PRISHTINË — Ish-kryetari i AAK-së, Ramush Haradinaj, deklaroi se rezultati i zgjedhjeve parlamentare nuk i ka dhënë asnjë partie të drejtën të qeverisë e vetme dhe se krijimi i institucioneve kërkon bashkëvendimmarrje mes pozitës dhe opozitës, raporton Ekonomia Online.

Duke komentuar mosarritjen e marrëveshjes në takimet e fundit, ai tha se verdikti i qytetarëve kërkon ndarje të përgjegjësive: “Qytetari ka votuar, populli ka votuar, sot jemi deputetë të zgjedhur. Ky rezultat kërkon bashkëvendimmarrje ose vendimmarrje të përbashkët.” Nuk i ka dhënë shumicë të duhur partisë fituese, theksoi ai.

Sipas tij, deri tani nuk është ofruar asnjë model bashkëvendimmarrjeje, por vetëm një ftesë që opozita të bëhet pjesë e qeverisë: “Kjo nuk e reflekton rezultatin.” Dallimi mes numrit të deputetëve të pozitës dhe opozitës nuk është aq i madh sa që vetëm fituesi i zgjedhjeve të mbajë vendimmarrjet, tha ai.

Nga dy postet e para — kryeministri dhe presidenti — njëri i takon opozitës në bazë të rezultatit, tha Haradinaj: “Ai që ka fituar zgjedhjet, nëse ka logjikë demokratike, e lexon kështu rezultatin e zgjedhjeve.” Akuzoi kryeministrin në detyrë, Albin Kurtin, se synon “me e poshtruar opozitën duke i ofruar vetëm përfitime të pushtetit” — “logjikë e regjimit”.

Haradinaj tha se opozita mund të kontribuojë në krijimin e institucioneve vetëm me bashkëvendimmarrje, jo thjesht duke marrë pjesë në ekzekutiv: “Opozita mundet me ndihmuar në krijimin e institucioneve, por kuptohet duhet të ketë bashkëvendimmarrje.” Aleanca nuk synon në asnjë variant vetëm përfitimet e pushtetit, por do të jetë pjesë vetëm me ndarje vendimesh, tha ai.

I pyetur nëse posti i presidentit duhet t’i takojë opozitës, ai sqaroi se nuk e kishte fjalën domosdoshmërisht për të: partia fituese mund t’i kërkojë kryeministrin, por mundet edhe dikush nga opozita të bëhet kryetar qeverie. Votimi i presidentit varet nga një marrëveshje politike e dy të tretave të deputetëve, shtoi ai.

Për kryetarin e AAK-së, Ardian Gjinin, tha se ka dëshmuar me rezultate si kryetar i suksesshëm i Komunës së Gjakovës dhe i partisë. Thelbi mbetet interpretimi i rezultatit: nëse nuk lexohet si bashkëvendimmarrje, “i bie që është e kotë edhe mbajtja e takimeve”, përfundoi ai.

Burim: Ekonomia Online
— Redaksia ZHURMA