Çfarë argumentoi Hamza për regresin e gjashtë viteve të fundit në Kosovë?
Kreu i PDK-së premton ndryshim, duke kritikuar mungesën e rezultateve dhe krizat politike të viteve të fundit.
PRISHTINË — Kryetari i Partisë Demokratike të Kosovës dhe kandidat për kryeministër, Bedri Hamza, ka deklaruar se qytetarët e Kosovës meritojnë rezultate konkrete, zhvillim dhe më shumë shpresë.
Përmes një postimi publik, Hamza theksoi se PDK-ja e kishte dorëzuar qeverisjen me Kosovën shtet të pavarur, me autostrada moderne, institucione stabile dhe partneritete me aleatët ndërkombëtarë. "Shtetin e kemi ndërtuar bashkë. Kemi ndërtuar polici dhe ushtri që sot janë shembull për rajonin", tha ai.
Hamza kritikoi Qeverinë aktuale për mungesë rezultatesh gjatë gjashtë viteve të fundit. Sipas tij, Kosova nuk mund të ecë përpara me fajësime, arsyetime dhe kriza të njëpasnjëshme politike, ndërsa familjet përballen me çmime të larta dhe vështirësi ekonomike. "Qytetarët meritojnë rezultate. Meritojnë zhvillim. Meritojnë shpresë. Koha për ndryshim është tani", përfundoi ai.
Burim: Zëri
— Redaksia ZHURMA