Gorani: Vetëvendosje ka nevojë për koalicion që të ndajë përgjegjësinë
Sipas opinionistit, Albin Kurti rrezikon vulosjen e imazhit historik nëse zbaton i vetëm Marrëveshjen e Ohrit, të cilën dikur e kishte kundërshtuar.
PRISHTINË — Lëvizja Vetëvendosje ka interes politik dhe historik që të ndajë përgjegjësinë për marrëveshjet me Serbinë me partnerë të tjerë qeverisës. Kështu deklaroi opinionisti Dukagjin Gorani në "Rubikon" të Klan Kosovës, duke theksuar se shpërndarja e përgjegjësisë është jetike për partinë në pushtet.
Gorani shpjegoi se Albin Kurti dëshiron të shmangë situatën ku vendimet e ardhshme të dialogut të mbeten vetëm mbi të. Zbatimi i Marrëveshjes së Ohrit dhe presionet që e shoqërojnë atë janë çështje për të cilat kryeministri në detyrë synon ta ndajë barrën politike.
Derisa liderët opozitarë shpesh deklarojnë se Kurti refuzon bashkëvendimmarrjen, Gorani vlerëson se Vetëvendosje aktualisht ka nevojë politike për koalicion. Sipas tij, Kurti rrezikon dëmtimin e imazhit të tij historik nëse zbaton i vetëm marrëveshjet që dikur i kishte kundërshtuar për shkak të pushtetit.
Sipas opinionistit, përfundimi i rrugëtimit politik duke implementuar të njëjtat marrëveshje që ka kundërshtuar mund të jetë i dëmshëm historikisht. Andaj, zgjerimi i paletës së pjesëmarrësve në dialog shihet si një nevojë emergjente politike dhe historike për kryeministrin aktual.
Ndonëse Vetëvendosje nuk ka nevojë për partnerë nga aspekti aritmetik i numrave, ajo ka nevojë për koalicion në aspektin strategjik. Ky hap do të shërbente për të shpërndarë përgjegjësinë e vendimmarrjes përpara proceseve të rënda që pritet të pasojnë.
Burim: Gazeta Metro
— Redaksia ZHURMA