Gjykata e Tetovës dënon 6 persona — inskenuan aksident për dëmshpërblim
Të dënuarit gënjyen policinë dhe mjekët se u lënduan në një aksident komunikacioni për të marrë para nga kompanitë e sigurimeve.
TETOVË — Gjykata Themelore në Tetovë ka dënuar gjashtë persona për mashtrim, pasi inskenuan një aksident komunikacioni për të marrë dëmshpërblime të paligjshme nga kompanitë e sigurimit. Të dënuarit kishin mashtruar zyrtarët policorë në SPB Tetovë dhe mjekun kujdestar në Spitalin Klinik të Tetovës duke u paraqitur rrejshëm si të lënduar.
Sipas aktgjykimit, aksident rrugor kishte pasur vetëm i akuzuari i parë, ndërsa pesë të tjerët, me urdhër të tij, kanë gënjyer se ndodheshin në automjet. I akuzuari i parë i kishte këshilluar dhe udhëzuar ata që të shkonin në spital e në polici dhe të paraqiteshin si të lënduar.
Të dënuarit u kontrolluan në qendrën emergjente të spitalit të Tetovës, ku mjeku kujdestar u lëshoi raporte mjekësore për lëndime të pretenduara trupore. Qëllimi i tyre ishte që t'i shfrytëzonin këto raporte pranë kompanive të sigurimit për kompensimin e dëmit jomaterial.
Ky dënim nxjerr në pah një skemë mashtrimi ku u përdorën të dhëna të rreme për të sjellë dobi pasurore të kundërligjshme. Gjykata i shpalli ata fajtorë për mashtrim të qëllimshëm të autoriteteve policore dhe shëndetësore.
Burim: Tetova Sot
— Redaksia ZHURMA
