Çfarë vendosi Gjykata për Bujar Ibishin?
Gjyqtari Izet Gërguri urdhëroi ekspertizë psikiatrike për Bujar Ibishin, akuzuar bashkë me babain për vrasjen e kushëririt në Skenderaj më 12 shkurt 2025.
MITROVICË — Gjykata e Mitrovicës aprovoi propozimin e avokatit Naim Rudari që ndaj Bujar Ibishit të kryhet ekspertizë psikiatrike. Gjyqtari Izet Gërguri tha se gjykata do ta urdhërojë me urdhëresë të veçantë Institutin e Psikiatrisë Forenzike të Kosovës (IPFK) për kryerjen e kësaj ekspertize. Bujar Ibishi dhe babai i tij, Hisni Ibishi, akuzohen për vrasjen e kushëririt të tyre, Ismet Ibishit, më 12 shkurt 2025, në një kafiteri në sheshin "Adem Jashari" në Skenderaj.
Avokati i Bujar Ibishit, Naim Rudari, tha se mbrojtja nuk kishte pranuar dosje mjekësore, por vetëm një raport prej dy faqesh. Sipas tij, raporti sillte rrethana të panjohura për gjendjen e të akuzuarit para, gjatë dhe pas ngjarjes.
Raporti përshkruante se i paraburgosuri ishte trajtuar në qendrën e paraburgimit dhe monitoruar për diagnozën çrregullim i personalitetit me tipare skizoide dhe çrregullim i personalitetit borderline. Sipas avokatit, pacienti kishte manifestuar ngarkesë të shtuar emocionale, ankth, labilitet emocional, si dhe prani të ideve suicidale.
Avokatja e Hisni Ibishit, Kada Bunjaku-Përçuku, propozoi ekzaminim të drejtpërdrejtë psikiatrik për të mbrojturin e saj, për të vërtetuar nëse të shtënat me armë i kreu në tronditje të fortë mendore. Sipas saj, ekspertiza me shkrim nuk kishte dhënë mendim mbi këtë rrethanë.
Prokurori i shtetit, Sahit Tmava, dhe avokati i palës së dëmtuar, Fisnik Sogojeva, kundërshtuan të dy propozimet e mbrojtjes, duke thënë se kishin qëllim zvarritjen e procedurës. Tmava tha se Prokuroria nuk kishte asnjë dokumentacion se Bujar Ibishi vuante nga çrregullim psikik para ose pas veprës.
Sipas avokatit Sogojeva, Departamenti Shëndetësor i Burgjeve kishte sqaruar se Bujar Ibishi nuk kishte shfaqur asnjë rrethanë që të tregonte mungesë vetëdijeje ditën kritike. Ai shtoi se vetë ekspertiza për Hisni Ibishin konfirmonte se aftësia e tij për të gjykuar veprën nuk ishte e afektuar.
Gjyqtari Gërguri refuzoi propozimin e avokates Bunjaku-Përçuku që IPFK-ja të plotësojë ekspertizën për Hisni Ibishin, por aprovoi kërkesën e saj që në seancën e radhës të ftohet kryesuesi i grupit të ekspertëve, për të dhënë sqarime shtesë.
Burim: Telegrafi
— Redaksia ZHURMA