Gjykata e Lartë e Brazilit rrëzon lirimin e Ervin Matës, mbetet në arrest
Vendimi i 21 korrikut e mban Matën në arrest në Brazil, mes akuzash për trafik lëndësh narkotike e krim të organizuar, në pritje të ekstradimit drejt Shqipërisë.
BRASILIA — Gjykata e Lartë Federale e Brazilit rrëzoi kërkesën për lirimin e Ervin Matës, shtetas shqiptar i arrestuar me qëllim ekstradimin drejt Shqipërisë. Vendimi mban datën 21 korrik 2026 dhe u mor nga ministri Alexandre de Moraes, relator i çështjes së ekstradimit nr. 1.925, ku kërkuese është Qeveria e Republikës së Shqipërisë.
Shqipëria kërkon ekstradimin e Matës për procedim penal për veprat e dyshuara të trafikut të lëndëve narkotike, si dhe pjesëmarrje në organizatë kriminale dhe grup të strukturuar kriminal, sipas dispozitave të Kodit Penal shqiptar. Masa e arrestit parandalues ndaj tij ishte caktuar më 11 mars 2025.
Arrestimi i tij nga Policia Federale braziliane u ekzekutua më 25 prill 2026. Më pas, Gjykata e Lartë Federale zhvilloi procedurat për marrjen në pyetje të Matës, ndërsa mbrojtja e tij paraqiti kundërshtime dhe kërkoi rrëzimin e kërkesës për ekstradim ose zëvendësimin e arrestit me masa alternative.
Avokatët e Matës pretenduan se Shqipëria nuk kishte respektuar afatin ligjor për formalizimin e kërkesës për ekstradim. Gjykata e Lartë braziliane nuk e pranoi këtë argument, duke vlerësuar se procedura ishte ndjekur rregullisht.
Moraes thekson se kërkesa formale ishte protokolluar pranë autoriteteve braziliane më 7 mars 2025 dhe u rikonfirmua përmes Notës Verbale nr. 46/2026 të Ambasadës së Shqipërisë, të përcjellë më 2 korrik 2026 — provë, sipas gjykatës, e vazhdimësisë së interesit shtetëror shqiptar për ekstradimin.
Edhe Prokuroria e Përgjithshme e Brazilit ishte shprehur në favor të pranimit të kërkesës dhe kundër lirimit të Matës. Në vendim citohet: "Kërkesa për ekstradim është paraqitur tashmë zyrtarisht në këtë Gjykatë; marrja në pyetje e personit të kërkuar për ekstradim është kryer; dhe mbrojtja e tij është njoftuar dhe ka pasur mundësi të paraqesë qëndrimin e saj."
Duke përmendur rrezikun e largimit të personit të kërkuar, Moraes vlerësoi se nuk ekzistojnë rrethana të jashtëzakonshme që justifikojnë heqjen e arrestit. Gjykata rrëzoi kërkesën për shfuqizimin e arrestit, nuk e zëvendësoi atë me masa të tjera dhe hodhi poshtë kërkesat për veprime hetimore shtesë. Ervin Mata mbetet në arrest.
Burim: Ora News
— Redaksia ZHURMA