Si e përmirësoi Florian Zeka rekordin në Prishtina Trails?

PRISHTINË — Florian Zeka, atlet i verbër nga Gjakova, ka përfunduar për herë të dytë "Prishtina Trails", garën më të madhe të vrapimit në shtigje malore në Kosovë, duke u renditur 35 vende më lart se herën e kaluar dhe duke thyer rekordin personal.

Edicioni i 8-të i garës u mbajt në Parkun e Gërmisë me 500 vrapues nga më shumë se 20 shtete. Zeka u shoqërua në çdo kilometër nga Kristian Gashi, i cili e ka ndihmuar edhe në Maratonën e Prishtinës më herët.

Sipas organizatorit X-Trailers, një nga momentet më të vështira të garës — ngjitja e "teleferikut" — Zeka e kaloi pa u ndalur. Pas "Prishtina Trails", ai vrapoi edhe 4 kilometra të tjerë në garën "Wings for Life".

Në një rrëfim për Telegrafin, Zeka ka folur për motivimin që e shtyn të sfidojë kufijtë. Përfundimi i tij u prit me duartrokitje nga publiku.

Burim: Telegrafi
— Redaksia ZHURMA