Botërori 2026 i sjell FIFA-s mbi 13 miliardë dollarë, rekord absolut
Kupa e Botës 2026 pritet të bëhet turneu më fitimprurës në historinë e futbollit
ZURIK — Kupa e Botës 2026 pritet të bëhet turneu më fitimprurës në historinë e futbollit, me FIFA-n që parashikon të ardhura rekord prej më shumë se 13 miliardë dollarësh gjatë ciklit të këtij Botërori.
Parashikimi fillestar i FIFA-s ishte rreth 11 miliardë dollarë, por kjo shifër është tejkaluar tashmë, duke e kthyer edicionin e vitit 2026 në një rekord absolut financiar për organizatën më të lartë të futbollit botëror.
Rritja e të ardhurave lidhet kryesisht me zgjerimin e turneut në 48 skuadra, numrin rekord prej 104 ndeshjesh, interesin e jashtëzakonshëm global, si dhe çmimet më të larta të biletave krahasuar me edicionet e mëparshme.
Për krahasim, Botërori i vitit 2022 në Katar gjeneroi rreth 7.5 miliardë dollarë të ardhura, ndërsa edicioni i zhvilluar në SHBA, Kanada dhe Meksikë pritet të sjellë një rritje të ndjeshme financiare për FIFA-n.
Por ambiciet ekonomike të organizatës nuk ndalen këtu. FIFA po shqyrton mundësinë e një zgjerimi të mëtejshëm për Kupën e Botës 2030, nga 48 në 64 skuadra, një ide që do të sillte më shumë ndeshje, më shumë tregje televizive dhe potencialisht edhe më shumë të ardhura.
Burim: Insajderi, https://insajderi.org/13-miliarde-dollare-nga-nje-boteror-fifa-gjen-minieren-e-arit-te-futbollit/
— Redaksia ZHURMA