Pse refuzoi Ferizaj medaljen e finales së Kupës së Kosovës?

PRISHTINË — FC Ferizaj ka reaguar ashpër pas finales së humbur të Kupës së Kosovës ndaj Dukagjinit, duke drejtuar kritikën te gjyqtari Genc Nuza. Në një postim në rrjetet sociale, klubi shkroi: “Genc Nuza, urime Kupa e Kosovës. Turpi ndryshe nuk është! Ne medalje nuk marrim”.

Tensionet u acaruan në minutat e fundit të ndeshjes. Gjyqtari Nuza dha katër minuta lojë shtesë, sasi që ferizajasit e konsideruan të pamjaftueshme duke pretenduar më shumë ndërprerje. Pas një rasti të diskutueshëm në zonë ku nuk u akordua penallti dhe as nuk u rishikua në VAR, kapiteni Haxhimusa u ndëshkua me kartonin e dytë të verdhë dhe u përjashtua. Ferizaj e braktisi fushën për rreth 10 minuta.

Klubi ende nuk ka sqaruar publikisht vendimin për refuzimin e medaljes. Institucionet përkatëse nuk kanë reaguar ende lidhur me incidentet e finales.

Burim: Telegrafi
— Redaksia ZHURMA