Fatjon Softa spjegon rregullat e përdorimit të plumbave të gomës

Eksperti i sigurisë Fatjon Softa spjegoi rregullat e përdorimit të plumbave të gomës nga policia, duke theksuar se ata duhet të përdoren nga një distancë prej jo më pak se 20 metra dhe vetëm në drejtim nga beli e poshtë. Deklaratat e tij erdhën gjatë emisionit Review në Euronews Albania me gazetaren Greta Topjana, në një kohë kur vëmendja është te plagosja e 28-vjeçarit Erjon Vishkulli në sy gjatë protestës.

Sipas Softës, përdorimi i këtyre municioneve lejohet vetëm kur rrezikohet jeta e punonjësve të policisë dhe kur mjetet e tjera të neutralizimit nuk kanë dhënë efekt. Ai sqaroi se qitja në distancë të afërt apo drejt pjesëve të sipërme të trupit dhe kokës është e ndaluar me protokoll, pasi forca kinetike e municionit mund të shkaktojë dëmtime të kockave, humbje të shikimit apo edhe efekte vdekjeprurëse.

Eksperti nënvizoi se përdorimi i plumbave të gomës në turmë mbart rrezik dhe duhet të monitorohet. Ai shtoi se çdo punonjës policie mban përgjegjësi ligjore për mosrespektim të protokollit. Softa tha se çdo rast i përdorimit me pasoja duhet të hetohet nga Agjencia e Mbikëqyrjes Policore dhe prokuroria, ku përgjegjësia mund të jetë penale deri në dënim me burgim.

Softa deklaroi se: «Ata përdoren vetëm në rastet kur mjetet e tjera të neutralizimit, kur rrezikohet jeta e punonjësve të policisë, nuk kanë dhënë efekt». Lidhur me drejtimin e goditjes, ai u shpreh se: «Duhet të goditet nga beli dhe poshtë, pra në gjymtyrët e poshtme. Jo lart! Jo, absolutisht lart! Është e ndaluar, sepse ka pasoja dhe në veçanti kur ajo përdoret në distanca të afërta». Më tej, për efektet e këtij municioni, eksperti shtoi se: «Vërtet themi që përbërja nuk është plumb, por është elementi gomë, por forca kinetike e saj kryen të njëjtat efekte». Për rastin e të riut të dëmtuar, ai tha se: «Në qoftë se në rastet konkrete përdoret ndaj trupit, ndaj kokës, në drejtim të syve etj., ajo krijon pasoja, si dhe rasti për të cilin është diskutuar dhe po diskutohet për një djalë të ri, i cili ka marrë goditjen në sy dhe është në luftë për të shpëtuar syrin dhe shikimin». Lidhur me përgjegjësinë ligjore dhe pasojat, Softa tha se: «Qitja e tyre në turmë, edhe pse mund të ketë trajnime, është e rrezikshme dhe ajo do të jetë e monitoruar. Personi mban përgjegjësi ligjore për mosrespektim të protokollit të përdorimit të tyre», si dhe vërejti se: «Efekti i saj është edhe vdekjeprurës, varet ku godet dhe në ç’formë godet. Mund të japë pasoja të rënda, duke filluar nga humbja e shikimit deri te goditjet në kokë. Forca e tyre kinetike është aq e madhe saqë edhe kockat mund t’i dëmtojë». Në fund, ai përsëriti se: «Të gjitha rastet e përdorimit të saj kërkojnë hetim».