Faqja zyrtare e Topit të Artë publikon gabimisht tre fitues të ndryshëm

Uebfaqja zyrtare e Topit të Artë bëri një gafë para ceremonisë së vitit 2026 në London Palladium në Londër, duke publikuar gabimisht tre artikuj të ndryshëm ku fitues shpalleshin Harry Kane, Lamine Yamal dhe Kylian Mbappé pak orë para shpalljes zyrtare të fituesit.

Raportimet e ndara në kanale të lidhura me çmimin prestigjioz individual kanë nxitur spekulime dhe paqartësi me shpejtësi në rrjetet sociale. Të tre futbollistët e përmendur kanë qenë në mesin e kandidatëve kryesorë për edicionin e vitit 2026, por publikimet paraprake nuk përbëjnë konfirmim zyrtar se cili lojtar e ka fituar trofeun.

Artikujt e përgatitur nga organizatorët ishin parashikuar për t'u shfaqur pas konfirmimit të fituesit, por u publikuan veçmas në faqe, njoftoi Daily Mail. Media britanike lajmëroi se e kishte njoftuar organizatorin për gabimin në orën 17:23, pas së cilës nisën telefonatat dhe komunikimet urgjente. Shkrimet për Harry Kane dhe Kylian Mbappé u hoqën nga faqja zyrtare, ndërsa artikulli për Lamine Yamal qëndroi i publikuar për më shumë se 30 minuta pasi organizatorët ishin vënë në dijeni. Gazeta spanjolle MARCA raportoi gjithashtu se këto materiale qarkulluan me shpejtësi në internet. Sipas Daily Mail Sport, organizatorët janë alarmuar nga incidenti dhe kanë nisur hetimet për të përcaktuar se si ndodhi publikimi i gabuar.

Teksti i publikuar për sulmuesin e Bayern Munichut, Harry Kane, e përshkruante atë si fitues të Topit të Artë pas një sezoni me 61 gola. Në artikullin tjetër pretendohu se ylli i Barcelonës, Lamine Yamal, ishte bërë fituesi më i ri në histori në moshën 19-vjeçare. Ndërkohë, Kylian Mbappé paraqitej si triumfues pas një sezoni me Real Madridin. Kane synon të bëhet anglezi i parë që merr trofeun që nga Michael Owen në vitin 2001, ndërsa Mbappé dhe Yamal kërkojnë ta fitojnë këtë çmim për herë të parë në karrierën e tyre. Fituesi zyrtar pritet të zbulohet gjatë ceremonisë së mbrëmjes që po mbahet në Londër.