Si jetojnë 3 fëmijë në kotecin e pulave, gjashtë vite pas tërmetit?

RROGOZHINË — Gjashtë vite e gjysmë pas tërmetit shkatërrues të nëntorit 2019, familja e Xhevahir Kajës jeton në fshatin Rreth-Greth, në një ndërtesë të improvizuar, të ndërtuar dikur për të mbajtur pula. Shtëpia e tyre në fshatin Kryevidh u shpall e pabanueshme (DS5), ndërsa tre fëmijët rrinë në kushte ekstreme: çatia pikon sa herë bie shi, lagështira ka zaptuar ambientin, dhe nuk ka hapësirë të mjaftueshme për përditën.

Edhe pse shteti miratoi një fond prej 22.365.520 lekësh për ndërtimin e një banese 2+1, punët nuk kanë nisur ende. Familja tregon se prej vitesh dëgjon të njëjtat premtime të përsëritura: "Sot", "nesër", "javën tjetër". Realiteti i tyre mbetet i njëjtë: ndërtesa e vjetër, kushte të vështira, kurrsesi shtëpi.

"Këtu jetojmë, këtu fle unë bashkë me nipërit. Është ftohtë, por nuk kemi çfarë të bëjmë," rrëfen gjyshja e familjes. Bashkëshortja e Xhevahirit shton: "Nuk kam asnjë elektroshtëpiake. Në kuzhinë nuk ka asgjë. Vetëm pak patate, disa turshi dhe ullinj të dhuruar. Vetëm burri punon kur gjen punë."

Xhevahir Kaja tregon se firma e ndërtimit "Braka" sh.p.k. kërkoi fillimisht sistemimin e rrugës dhe sheshit ku do të ndërtohej banesa. Familja, me ndihmën e të afërmve, bëri këtë investim me shpresën se punimet do të nisnin, por askush nuk u kthye më.

Fiks Fare kontaktoi kompaninë e ndërtimit dhe Bashkinë Rrogozhinë. Firma deklaroi se pret lejen e ndërtimit. Bashkia sqaroi se në sistem nuk rezulton asnjë aplikim i depozituar për këtë leje.

Pas interesimit të emisionit, palët ranë dakord të bashkëpunojnë. Bashkia u shpreh se procedurat do të përshpejtohen sapo të dorëzohet praktika e plotë, ndërsa përfaqësuesi i firmës premtoi të ndihmojë familjen në çdo hap.

Pas më shumë se gjashtë vitesh pritje, familja Kaja shpreson që këtë herë premtimet t'u kthehen në shtëpi. Dokumentacioni, bashkia dhe firma duhet të bashkëpunojnë për të nxjerrë përfundimisht familjen nga stalla.

Burim: Top Channel
— Redaksia ZHURMA