Emira Maqedonci fiton medaljen e artë në Ballkanik

Karateistja kosovare Emira Maqedonci ka shkëlqyer në Kampionatin Ballkanik për kadetë, juniorë dhe U21, i cili po mbahet në Stamboll të Turqisë, duke fituar medaljen e artë dhe titullin e kampiones në kategorinë juniore, deri në 48 kilogramë.

Gjatë këtij kompeticioni, ajo ka regjistruar pesë fitore radhazi për t'u ngjitur në shkallën më të lartë të podiumit. Ky sukses shënon titullin e tretë të kampiones së Ballkanit për sportisten, e cila arrin në finalen e këtij eventi për herë të katërt në karrierë, duke mbajtur një bilanc prej tri medaljesh të arta dhe një të argjendtë.

Me këtë paraqitje të jashtëzakonshme, Maqedonci ka konfirmuar potencialin dhe vazhdimësinë e rezultateve të mira, duke përfaqësuar denjësisht Kosovën në arenën ndërkombëtare të karatesë.