Kosova ekstradon në Danimarkë të kërkuarin për vrasje

PRISHTINË — Policia e Kosovës ka realizuar ekstradimin e një shtetasi danez, i cili kërkohej nga autoritetet e Danimarkës me urdhër ndërkombëtar arresti të lëshuar përmes INTERPOL-it. Ekstradimi u krye përmes Aeroportit Ndërkombëtar “Adem Jashari” në Prishtinë, nën koordinimin e Drejtorisë për Bashkëpunim Ndërkombëtar Policor, në bashkëpunim me njësitë kompetente të Policisë së Kosovës dhe institucionet e drejtësisë.

Sipas njoftimit zyrtar, i dyshuari ishte arrestuar më herët në Kosovë pasi rezultonte në kërkim ndërkombëtar nga autoritetet daneze. Ai përballet me akuza për veprat penale të vrasjes, mbajtjes së armëve të zjarrit në rrethana veçanërisht rënduese dhe zjarrvënies.

Ekstradimi u bë në përputhje me legjislacionin në fuqi dhe si rezultat i bashkëpunimit të ngushtë ndërmjet institucioneve të Kosovës dhe Danimarkës në luftën kundër kriminalitetit ndërkombëtar. Burim: Sinjali, https://sinjali.com/kosova-ekstradon-ne-danimarke-nje-te-kerkuar-nga-interpol-i-per-vrasje-dhe-zjarrvenie/
— Redaksia ZHURMA