Berisha: Rama dhe vëllai përfituan 221 mijë metra pronë publike

Kreu i Partisë Demokratike, Sali Berisha, ka deklaruar në një konferencë për mediat se kryeministri Edi Rama dhe vëllai i tij, Olsi Rama, kanë përfituar një sipërfaqe prej 221 mijë metrash katrorë tokë publike në Kanionin e Gjipesë për ndërtimin e një hoteli. Sipas kryetarit të opozitës, procesi i përfitimit të kësaj sipërfaqeje në bregdet ka nisur pas marrjes së pushtetit nga Edi Rama, duke përdorur ndikimin politik dhe pa pasur dokumentacion kadastral historik që të dëshmojë pronësinë private mbi truallin.

Në prononcimin e tij para gazetarëve, lideri demokrat u shpreh se zona e kanionit ka qenë pronë publike ndër shekuj dhe nuk ka pasur kurrë pronarë privatë. Berisha theksoi se trualli nuk dispononte asnjë dokument kadastral arkivor, qoftë nga periudha e perandorisë, mbretërisë apo diktaturës, duke hedhur akuza të forta ndaj familjarëve të kreut të qeverisë për shfrytëzim të pozitës zyrtare.

Sipas deklaratave të bëra publike nga kreu i PD-së, në këtë proces janë përfshirë edhe pinjollë të familjes Koleka, ndërsa trualli prej 221 mijë metrash katrorë shtrihet në një nga kanionet më të bukura të bregdetit. «Aty nxin me të gjithë shëmtinë e tij ndërtimi i hotelit ‘Edi Rama’ në Kanionin e Gjipesë, kanion që në shekuj ka qenë pronë publike», u shpreh Berisha gjatë konferencës, duke shtuar se personat e përfshirë janë vërsulur si peshkaqenë për të marrë pronën pa dokumente të rregullta ligjore.

Lidhja e këtyre zhvillimeve me institucionet e drejtësisë u përmend gjithashtu gjatë takimit, ku kreu i opozitës iu referua njoftimit të Prokurorisë së Posaçme Kundër Korrupsionit dhe Krimit të Organizuar për hapjen e një hetimi mbi dosjen e njohur si “Albanian File”. Megjithatë, lideri demokrat shprehu skepticizëm se këto hetime do të mund të çojnë në ndonjë penalizim real të kryeministrit Edi Rama.