Dy tragjeditë zbehin “Darkën e Lamës” në Gjonaj të Hasit

Manifestimi tradicional “Darka e Lamës” u organizua për herë të katërt në fshatin Gjonaj të Hasit, ku morën pjesë banorë vendas, nënkryetari i Komunës së Prizrenit, Kujtim Gashi, përfaqësues institucionalë dhe vizitorë nga Shqipëria e vendet e huaja. Ngjarja u shoqërua me tradita vendase, ekspozimin e gatimeve nga furrtarët hasjanë dhe përgatitjen e flisë gjigante.

Ky manifestim, i njohur gjithashtu si “Darka e Lamijeve”, “Darka e Fushës” dhe “Darka e Bereqetit”, shënon kremtimin e përfundimit të të korrave të drithërave dhe të korrave vjeshtore, si dhe falënderimin për begatitë e vitit, duke u shtruar për të festuar një vit të begatshëm.

Aktiviteti i këtij viti nuk e pati shkëlqimin e duhur për shkak të dy rasteve tragjike të ndodhura gjatë javës së fundit, ku dy të rinj nga fshati Gjonaj humbën jetën si pasojë e aksidenteve. Për këtë arsye, SHKA “Malësori” nuk e paraqiti pjesën artistike të parashikuar në program.

Kryetari i SHKA “Malësori”, Haziz Hodaj, tha se kjo ngjarje është ndër festat origjinale dhe autoktone që përfaqëson më së miri traditat hasjane. Nënkryetari Kujtim Gashi theksoi se festa të tilla, të cilat kontribuojnë në ruajtjen e traditave shqiptare, duhet të organizohen dhe përkrahen vazhdimisht. Drejtoresha për Kulturë, Rini e Sport në Prizren, Ajlin Shishko, u shpreh se Hasi ka qenë dhe mbetet trevë e njerëzve punëtorë, bujarë, mikpritës dhe atdhedashës, që kanë ruajtur me krenari vlerat kombëtare ndër breza. Veterani i arsimit nga Zymi i Hasit, Prenk Prenkaj, përgëzoi organizatorët për këtë aktivitet që e riktheu në kohën e përfundimit të të korrave dhe përballjes me dimra të gjatë. Për përgatitjen e flisë gjigante ishte angazhuar Ramadan Totaj me shokë, i cili tregoi se pse kjo pjatë ka shije të veçantë.