Dy shqiptarë arrestohen në Itali për tentativë vrasjeje
25-vjeçari shqiptar plagoset nga armë zjarri në Mirano
MIRANO — Dy shqiptarë janë arrestuar në Itali, të dyshuar për një tentativë vrasjeje me armë zjarri ndaj një 25-vjeçari shqiptar në Mirano. Ngjarja ndodhi më 1 korrik, ndërsa arrestimet u kryen pas një muaji kërkimesh nga karabinierët e Mestre, Mirano dhe Jesolo, me ndihmën e njësisë kinofile të Torreglias.
Sipas hetimeve, viktima R.K. ishte sulmuar edhe më herët, gjatë muajve shkurt-mars, bashkë me të dashurën e tij. Dyshohet se konflikti nisi pasi 25-vjeçari kishte vendosur të largohej nga shitja e drogës dhe të punonte në sektorin e ndërtimit në Venecia.
Sipas Prokurorisë, ky vendim nuk ishte pranuar nga një grup kriminal, i cili dyshohet se tentoi ta detyronte të rikthehej në aktivitetin e paligjshëm. Më 1 korrik, në rrugën Via Desman në Mirano, dyshohet se ndaj tij u organizua një sulm me armë.
Në pritje të të riut ishin Luigj Makaj, 44 vjeç, i dyshuar si porositësi i sulmit, dhe Armiol Gjoka, 40 vjeç, i njohur me nofkën “Molli”. Sipas hetimeve, dy të dyshuarit i kërkuan 25-vjeçarit të ndalonte për të folur, por ai nisi të largohej me vrap.
Hetuesit dyshojnë se Makaj i kërkoi Gjokës ta ndiqte, ndërsa ky i fundit qëlloi me pistoletë në drejtim të pjesës së sipërme të trupit. Plumbi e preku pranë zonës mes klavikulës së djathtë dhe qafës.
Burim: Ora News
— Redaksia ZHURMA