Adam Port vjen në Sunny Hill me hitin global “Move”
Në edicionin e këtij viti performon edhe Rampa, ndërsa festivali mbahet 31 korrik–2 gusht në Prishtinë.
PRISHTINË — Adam Port, anëtar i kolektivit gjerman Keinemusik dhe një nga emrat më të spikatur të skenës ndërkombëtare të muzikës elektronike, do të performojë këtë vit në Sunny Hill Festival. Ai qëndron pas hitit global të verës “Move”, i realizuar në bashkëpunim me prodhuesin Stryv dhe vokalistin Malachiii.
“Move” u bë një nga këngët më të dëgjuara të muzikës elektronike verore, duke fituar popullaritet të madh në platformat streaming, në setet e DJ-ve ndërkombëtarë dhe në skenat e festivaleve më të mëdha në botë.
Përveç Adam Port, në lineup-in e Sunny Hill do të jetë edhe Rampa, po ashtu pjesë e Keinemusik, i njohur për setet e tij atmosferike. Festivali mbahet nga 31 korriku deri më 2 gusht në Prishtinë, me emra të tjerë të konfirmuar si Katy Perry, Martin Garrix, Pawsa, Carlita, Seth Troxler dhe Manifest.
Biletat e rregullta janë tashmë në shitje përmes uebfaqes zyrtare sunnyhillfestival.com, ndërsa organizatorët njoftojnë se emra të tjerë pritet të zbulohen gjatë ditëve në vijim.
Burim: Nacionale
— Redaksia ZHURMA