Drita pret sonte Florianën për kalimin te Tre Fiori
Ndeshja e kthimit zhvillohet sonte nga ora 20:00 në stadiumin "Fadil Vokrri"; gjilanasit kërkojnë fitore pas barazimit 1-1 në Maltë.
PRISHTINË — Drita zhvillon sonte (e martë) ndeshjen e kthimit ndaj Florianas, në raundin e dytë kualifikues të Ligës së Konferencës. Skuadra gjilanase synon të kalojë në raundin e tretë pas barazimit 1-1 në ndeshjen e parë të zhvilluar në Maltë, ku rezultati mund të kishte qenë më pozitiv për Dritën.
Në ndeshjen e parë, gjilanasit kaluan në epërsi përmes Liridon Balajt në minutat shtesë, por Floriana arriti të barazojë në minutën e 102-të. Ndeshja u zgjat për shkak të problemeve me energjinë elektrike në stadium.
Drita kërkon të përsërisë performancën e mirë me më shumë efikasitet para portës, pasi rastet e humbura në Maltë ishin një arsye thelbësore e barazimit. Në rast kalimi, skuadra kosovare do të përballet me Tre Fiorin nga San Marino në raundin e tretë të këtij rrugëtimi evropian.
Ndeshja zhvillohet sonte (e martë) nga ora 20:00 në stadiumin "Fadil Vokrri" në Prishtinë, ku përkrahja e tifozëve vendas pritet të ketë rol vendimtar në arritjen e kualifikimit të Dritës. Burim: Ekonomia Online
— Redaksia ZHURMA