Dorian Puka humb apelin e azilit në gjykatën e emigracionit

Dorian Puka, 32 vjeç, i dënuar disa herë për vjedhje, humbi apelin kundër dëbimit pasi Gjykata e Emigracionit nuk pranoi pretendimet e tij se jeta në Shqipëri i rrezikohej nga një bandë kriminale.

Shtetasi shqiptar pritet të dëbohet nga Britania e Madhe pasi gjykata rrëzoi kërkesën e tij për të qëndruar në vend. Sipas dokumenteve gjyqësore të cituara nga gazeta britanike „Daily Mail“, Puka është dënuar katër herë me burg për vjedhje dhe vepra të tjera penale, ndërsa pas çdo dënimi është kthyer në Shqipëri përmes dëbimit, për t'u rikthyer më pas në mënyrë të paligjshme në Britani.

Puka mbërriti për herë të parë në Britani në vitin 2012 ose 2013. Në janar të vitit 2016, ai u dënua me nëntë muaj burg për vjedhje, por u dëbua drejt Shqipërisë pas një muaji. Më 3 nëntor të po atij viti u dënua me dy muaj burg për vjedhje dhe u kthye në Shqipëri pas 20 ditësh. Pas një tjetër rikthimi, ai u arrestua më 17 nëntor 2017 dhe u dënua me 42 muaj burg për vjedhje, vjedhje të tjera pasurore dhe shkelje të rregullave të drejtimit të automjeteve, ndërsa u dëbua më 20 dhjetor 2018.

Në gusht 2019 ai u arrestua sërish për drejtim të rrezikshëm të automjetit, drejtim pa të drejtë dhe mbajtje të mjeteve për kryerjen e vjedhjeve, u dënua me 18 muaj burg dhe u dëbua më 29 korrik 2020. Sipas deklarimeve të tij, ai hyri për herë të fundit ilegalisht në Britani më 15 tetor 2021. Në dhjetor 2022 kërkoi leje qëndrimi, në korrik 2023 paraqiti kërkesë për azil, e cila u refuzua nga autoritetet britanike në shtator 2024.