Kush u akuzua për kontrabandë droge?

— PRISHTINË — Shtetasi kosovar R.E. është privuar nga lirësia, pasi në pikën kufitare Bllacë, gjatë kontrollit doganor, dhunshëm dhe në mënyrë të paligjshme e kaloi pikën kalimtare me automjetin në të cilin kontrabandoi drogë, duke vënë në rrezik jetën e punonjësit doganor që e ndaloi për kontroll të detajuar. Kundër tij është dorëzuar kallëzimi penal për dyshimin e bazuar se ka kryer vepra penale “prodhim dhe lëshim i paautorizuar në qarkullim i narkotikëve, substancave psikotrope dhe prekursorëve”, si dhe “pengim i personit zyrtar në ushtrimin e detyrës zyrtare”, të dyja të dënueshme sipas Kodit Penal.

Më 15 korrik, në orët e mbrëmjes, punonjësit doganorë në pikën kufitare Bllacë e ndalën për kontroll doganor të dyshuarin tashmë të arrestuar R.E. Kontrolli është kryer nga dy punonjës doganorë, ku personi u thirr të hapë bagazhin e mjetit për verifikim. Në momentin kur i dyshuari kuptoi se njëri nga punonjësit doganorë e kishte vënë re çantën nën sediljen e bashkëshoqëruesit dhe u përpoq ta kontrollonte, ai hyri në mënyrë të paligjshme në automjet dhe dhunshëm e kaloi vijën kufitare, duke tërhequr me vete punonjësin doganor që u përpoq ta ndalonte.

Është thirrur policia kufitare, e cila bashkë me punonjësin doganor, pas një ndjekjeje dhjetëminutëshe, ia preu rrugën dhe personi u privua nga lirësia. I dyshuari iu dorëzua Departamentit për Hetime pranë Sektorit për Kontroll dhe Hetime në Drejtorinë e Doganave, i cili e mori rastin dhe pas veprimeve hetimore dorëzoi kallëzimin penal në Prokurorinë Publike Themelore Shkup.

Gjatë ikjes, i dyshuari e hodhi çantën me drogë, e cila u gjet pranë vendit të arrestimit. Me urdhër të prokurorit publik, droga iu nënshtrua ekspertizës, ku u konstatua se bëhet fjalë për drogën narkotike marihuanë me peshë një kilogram. Te i dyshuari u gjet gjithashtu edhe armë e ftohtë. Punonjësi doganor që u tërhoq dhunshëm gjatë përpjekjes për ta ndaluar të dyshuarin në ikje, pësoi lëndime të lehta trupore. Të dy punonjësit doganorë që morën pjesë në intervenim në pikën kufitare Bllacë, janë shembull i guximit të përditshëm që punonjësit e investojnë në shërbim, me qëllim mbrojtjen e shtetit.

Burim: Almakos, https://almakos.com/dorezohet-kallezim-penal-kunder-shtetasit-kosovar-qe-dhunshem-e-kaloi-vijen-kufitare-pasi-u-kap-duke-tentuar-te-kontrabandoje-droge/
— Redaksia ZHURMA