DokuFest nis edicionin e 25-të — 104 filma në garën zyrtare

PRIZREN — Edicioni i 25-të i festivalit ndërkombëtar të filmit dokumentar dhe të shkurtër, „DokuFest”, nis sot në Prizren, duke shndërruar qytetin historik për nëntë ditë rresht në qendrën kryesore të kinematografisë. Organizatorët kanë përfunduar të gjitha përgatitjet teknike për të mirëpritur mijëra vizitorë e artistë nga mbarë bota.

Drejtoresha e Kulturës në Prizren, Ajlin Shishku, ka konfirmuar se ky festival tashmë është shndërruar në një pjesë të rëndësishme të identitetit të qytetit. Përveç shfaqjes së filmave, gjatë këtij edicioni do të organizohen katër net radhazi koncerte me bende të ndryshme muzikore, të cilat do të nisin nga data 12 deri më 15 gusht.

Në këtë edicion jubilar, organizatorët kanë pranuar një numër rekord prej 3.687 aplikimesh nga vende të ndryshme të botës. Pas procesit të përzgjedhjes, në garën zyrtare janë përfshirë gjithsej 104 filma, të cilët do të shfaqen në tetë kategori të ndryshme konkurruese në lokacione të ndryshme të qytetit.

Për t’u orientuar më lehtë, vizitorët do të kenë në dispozicion harta të veçanta me të gjitha vendet e shfaqjeve. Përveç filmave dhe koncerteve, adhuruesit e festivalit mund të vizitojnë pikën e shitjes „DokuShop”, ku ofrohen bluza, gota, çanta dhe suvenire të tjera të personalizuara të këtij edicioni.

Asistentja e kësaj pike, Dua Gurgushka, tregoi se çmimi i një bilete për shfaqjet e filmave sivjet është caktuar të jetë katër euro. Pjesë aktive e organizimit të logjistikës së festivalit janë bërë edhe shumë të rinj vendas, për të cilët kjo përvojë konsiderohet mjaft e vlefshme për zhvillimin e tyre.

Në mesin e vizitorëve të shumtë është edhe Shan Kolaj nga Shqipëria, i cili tregon se po viziton Prizrenin për herë të parë. Ai u shpreh i impresionuar nga bukuria dhe gjallëria e qytetit, ku vizitoi monumentet historike si Kalanë dhe kompleksin e Lidhjes së Prizrenit.

Burim: Koha.net
— Redaksia ZHURMA