Dogana kap 30 mijë euro në Vërmicë — ishin fshehur në dollap e jastëk
Kartëmonedhat ishin fshehur në dollapin e kamionit dhe në jastëkun e shoferit, i cili deklaroi se nuk kishte asgjë për të paraqitur para zyrtarëve.
VËRMICË — Zyrtarët e Doganës së Kosovës, në një aksion të përbashkët me Policinë e Kosovës, kanë zbuluar një sasi prej 30 mijë eurosh të padeklaruara në pikën kufitare në Vërmicë. Rasti ka ndodhur në hyrje të vendit, kur për kontroll është paraqitur një kamion me gjysmërimorkio të zbrazët.
Gjatë intervistimit nga zyrtari doganor, drejtuesi i automjetit, shtetas i Republikës së Kosovës, ka deklaruar se nuk posedonte asgjë për të paraqitur pranë autoriteteve. Megjithatë, bazuar në analizën e rrezikut, zyrtarët kanë ndërmarrë një kontroll më të hollësishëm të mjetit, ku morën pjesë dy institucionet e sigurisë.
Gjatë këtij kontrolli të përbashkët janë gjetur mjete monetare të fshehura në dollapin e kamionit, si dhe një pjesë tjetër brenda jastëkut të shoferit. Zyrtarët kanë sqaruar se paratë ishin të ndara në kartëmonedha prej 20, 50, 100 dhe 200 euro, të cilat u sekuestruan menjëherë.
Mjetet monetare janë ndaluar përkohësisht dhe rasti është proceduar në përputhje me dispozitat e Kodit Doganor dhe të Akcizave të Kosovës. Legjislacioni në fuqi detyron çdo person që transporton 10 mijë euro ose më shumë që t'i deklarojë ato plotësisht pranë autoriteteve kufitare.
Burim: Koha.net
— Redaksia ZHURMA
