Daku zgjedh Spartakun e Moskës — tifozët rusë thërrasin kundër Kosovës

MOSKË — Sulmuesi kosovar Mirlind Daku ka përzgjedhur klubin rus Spartak Moska për të vazhduar karrierën e tij futbollistike, ku pritet të përfitojë disa milionë euro. Megjithatë, ky transferim shoqërohet me polemika të mëdha për shkak të qëndrimeve tejet armiqësore që tifozët e këtij klubi rus mbajnë hapur ndaj shtetit të Kosovës.

Gjatë ndeshjes së Kupës së Rusisë të së mërkurës mbrëma kundër skuadrës Orenburg, futbollisti ka ndjekur lojën nga tribunat e stadiumit. Aty ai ka dëgjuar thirrjet e vazhdueshme “Kosova – Serbia” nga një numër i madh i tifozërisë vendase, e cila shpalosi edhe një flamur me mbishkrimin e njëjtë provokues.

Sipas raportimeve të mediave vendase ruse “bombardir.ru” dhe “inkazan.ru”, thirrjet e tifozëve të Spartakut kanë shkuar deri në mesazhe ekstremiste si “mbyte, mbyte shqiptarin” dhe “rusët dhe serbët janë vëllezër përgjithmonë”. Kjo situatë e vështirëson integrimin e Dakut në klub, duke u përballur me mesazhe urrejtjeje ende pa zbritur në fushën e lojës.

Burim: Koha.net
— Redaksia ZHURMA