Dogana gjermane sekuestron 32 lëkura pitoni të destinuara për në Shqipëri

Autoritetet doganore gjermane kanë sekuestruar në aeroportin Leipzig/Halle një pako me 32 lëkura pitoni të ngjyrosura në blu, të kuqe dhe të zezë, me gjatësi nga 3.4 deri në 4.5 metra, e cila ishte nisur nga Indonezia me destinacion përfundimtar Shqipërinë.

Sipas njoftimit të administratës doganore dhe medieve gjermane, ngarkesa tranzit me peshë 13 kilogramë u zbulua të premten në mbrëmje gjatë një kontrolli rutinë të transportit ajror. Pitonët dhe produktet e tyre mbrohen nga Rregullorja e Bashkimit Europian për Tregtinë e Kafshëve të Egra. Legjislacioni europian vendos kufizime të rrepta tregtare dhe kërkon leje apo dokumentacion të posaçëm për çdo import, eksport apo kalim tranzit të specieve të rrezikuara të kafshëve dhe bimëve në territorin e bllokut.

Dokumentet e transportit deklaronin se pakoja me vlerë prej 160 dollarësh përmbante vetëm një xhaketë mode dhe një copë pëlhure batik prej pambuku. Dyshimet e zyrtarëve lindi pasi një qen i specializuar për zbulimin e produkteve të kafshëve të egra dhe specieve të mbrojtura sinjalizoi praninë e materialeve të dyshimta. Gjatë kontrollit të imtësishëm, zyrtarët doganorë gjetën lëkurat e gjarpërinjve me motive karakteristike, si dhe katër copa të tjera pëlhure brenda të njëjtës dërgesë. Meqenëse pakoja nuk shoqërohej me lejet e nevojshme për kalimin tranzit, dogana urdhëroi sekuestrimin e plotë të saj.

Në hapat e ardhshëm, Agjencia Federale për Mbrojtjen e Natyrës (BfN) në Gjermani pritet të shqyrtojë rastin dhe të vendosë nëse ky transportim do të ndiqet penalisht. Sipas rregulloreve në fuqi për mbrojtjen e natyrës, shkeljet e tilla mund të ndëshkohen me gjoba administrative që arrijnë deri në 50 mijë euro ose me dënim me burgim deri në pesë vjet.