Çfarë dënimesh rrezikon diaspora për publikimin e fletëvotimeve?
Juristët paralajmërojnë dënime deri në 6 muaj burg për cenimin e fshehtësisë së votimit në zgjedhjet e 7 qershorit.
PRISHTINË — Në rrjetet sociale kanë nisur të publikohen fotografi dhe video të fletëvotimeve të plotësuara nga persona në diasporë, të cilët po votojnë përmes postës për zgjedhjet e 7 qershorit. Sipas juristëve, ky veprim hyn në kuadër të veprave penale dhe mund të çojë në dënime me burg deri në 6 muaj.
Mbi 105 mijë shtetas të regjistruar nga 22 shtete po votojnë përmes postës. Në videot e shpërndara në Facebook, Instagram dhe TikTok shfaqen persona teksa mbushin fletëvotimet, duke zbuluar edhe votat për kandidatë të caktuar për deputetë. Neni 205 i Kodit Penal të Kosovës parashikon burgim deri në 6 muaj për këdo që cenon fshehtësinë e votimit.
Juristi Ardian Bajraktari thekson se as personat jashtë territorit të Kosovës nuk janë të imunizuar nga ndjekja penale. "Nga ndjekja penale nuk janë të përjashtuar as personat që ndërmarrin veprime të tilla e që ndodhen jashtë territorit të Kosovës sepse edhe Kodi Penal, por edhe marrëveshjet e bashkëpunimit e mundësojnë ndjekjen", ka thënë ai. Sipas Kodit, legjislacioni penal kosovar mund të zbatohet ndaj çdo personi që kryen vepra penale jashtë vendit kur ka marrëveshje ndërkombëtare.
KOHA ka tentuar të marrë informacione nga koordinatorja Nacionale për Zgjedhje, prokurorja Laura Pula, por ajo nuk ka kthyer përgjigje. Vitin e kaluar, Prokuroria Themelore në Prishtinë kishte autorizuar Policinë të niste hetime për "Cenim të fshehtësisë së votimit" për raste të ngjashme.
Analisti politik Arbnor Sadiku vlerëson se publikimi i votës përdoret si strategji partiake për të krijuar përshtypjen e mbështetjes së gjerë në diasporë. "Mund të jetë si një strategji e partive politike për të mobilizuar masat e veta partiake, natyrisht për të treguar forcën e tyre karshi votuesve që ata i kanë në diasporë", deklaroi ai.
Procesi i votimit përmes postës ka nisur më 21 maj dhe do të mbyllet më 6 qershor. Të njëjtën ditë do të votojë edhe pjesa tjetër e diasporës në përfaqësitë diplomatike.
Burim: Koha.net
— Redaksia ZHURMA