Kush dëshiron ta përjashtojë diasporën nga zgjedhjet lokale?
Kreu i Lidhjes Shqiptare thotë se VMRO-DPMNE do ta përjashtojë diasporën për të rifituar komuna si Kërçova, Buteli dhe Bërvenica.
SHKUP — VMRO-DPMNE dëshiron ta përjashtojë diasporën nga votimi me postë ose në mënyrë elektronike në zgjedhjet lokale, në mënyrë që të rifitojë komuna si Kërçova, Buteli dhe Bërvenica, tha kreu i Lidhjes Shqiptare, Ziadin Sela, në një konferencë për shtyp. Sela kërkoi që diasporës t'i mundësohet vota elektronike edhe për zgjedhjet presidenciale e parlamentare, jo vetëm ato lokale.
Sela bëri thirrje që të gjithë aktorët politikë shqiptarë të bashkohen me idenë e Lidhjes Shqiptare për votimin e diasporës, pa e hequr atë nga zgjedhjet lokale. Ai tha se partia e tij mbështet edhe ndryshime të tjera në Kodin Zgjedhor, përfshirë listat e hapura dhe tetë njësi zgjedhore.
Kërkesa vjen mes debatesh për ndryshimet e Kodit Zgjedhor, me votën e diasporës në zgjedhjet lokale si pikë kryesore mospajtimi mes VMRO-DPMNE-së dhe partive shqiptare.
Burim: TV21
— Redaksia ZHURMA