Diaspora proteston në Hagë për Rrjollin — kërkohet transparencë për 1200 hektarë

HAGË — Banorja e Rrjollit dhe aktivistja Luçiana Kokaj tha sot nga sheshi i protestës se diaspora shqiptare ka protestuar në Holandë dhe ka kërkuar ndihmën e qeverisë atje që të bëjë transparente projektet e dyshimta të qeverisë shqiptare.

Ajo tha se ata janë mbledhur për të mbrojtur tokat në zonën e Rrjollit, duke ngritur shqetësime për projektet që, sipas saj, po zhvillohen pa transparencë. Kokaj tha se një ish-drejtor i Hipotekave disponon mbi 1200 hektarë tokë në Rrjoll dhe se, sipas saj, banorët nuk kanë informacion të plotë për këtë çështje.

Kokaj lexoi edhe pjesë nga një letër e dërguar nga diaspora në Holandë drejt autoriteteve holandeze, ku kërkohet shqyrtimi i projektit dhe transparencë mbi investimet. Sipas Kokajt, pritet një reagim nga autoritetet holandeze lidhur me kompanitë holandeze që planifikojnë të investojnë në Shqipëri, me qëllim garantimin e transparencës.

“I kërkojmë qeverisë holandeze që të shqyrtojë projektin, jo të hyjë në politikat shqiptare”, thuhet në letër. Dhe më tej theksohet se: “Presim që shteti holandez të reagojë, për kompanitë holandeze që do të investojnë në Shqipëri, që të bëhet transparencë. Më vjen keq që nuk e kemi këtë mundësi në Shqipëri që qeveria të bëjë transparencë me projektet. Ndaj kërkojmë dorëheqje!”, theksoi ajo.

Burim: Almakos
— Redaksia ZHURMA