Dua Lipa kuron Festivalin e Letërsisë në Londër
Ngjarja kulturore në Southbank Centre do të mbledhë emra si Patti Smith e Zadie Smith, ndërsa shitja e biletave nis më 5 gusht.
LONDËR — Këngëtarja me origjinë shqiptare, Dua Lipa, në bashkëpunim me platformën e saj Service95 Book Club, do të kurojë edicionin e sivjetmë të Festivalit të Letërsisë në Londër. Ngjarja që do të mbahet në Southbank Centre synon të promovojë leximin dhe të sjellë në skenë emra të njohur të letërsisë, poezisë dhe mendimit bashkëkohor.
Në këtë edicion do të marrin pjesë figura të shquara ndërkombëtare si Patti Smith, Zadie Smith dhe artisti Mustafa. Ndër pikat kryesore të programit do të jetë mbrëmja e letërsisë së përkthyer ku prezantohen Samanta Schweblin nga Argjentina dhe Nelio Biedermann nga Zvicra, si dhe diskutimi mbi lirinë e shprehjes dhe censurën në bashkëpunim me English PEN.
Përmes këtij angazhimi, Dua Lipa po zgjeron ndikimin e saj në promovimin e letërsisë globale. Regjistrimet për qasje të hershme në bileta janë hapur tashmë përmes platformës Service95, ndërsa shitja e përgjithshme do të nisë zyrtarisht më 5 gusht. Ky bashkëpunim dëshmon ndikimin e madh të artistes në skenën kulturore ndërkombëtare.
Burim: Zëri
— Redaksia ZHURMA
