25-vjeçari shqiptar sulmohet me armë në Itali — braktisi drogën për ndërtimin
Vendimi për të mos vijuar më bashkëpunimin me trafikun e drogës dyshohet se e vuri të riun në shënjestër.
MIRANO — Një 25-vjeçar shqiptar është bërë objekt i një sulmi të armatosur në Itali, pasi vendosi të largohej nga aktiviteti i paligjshëm dhe t’i drejtohej një pune të rregullt në sektorin e ndërtimit. Sipas hetimeve të autoriteteve italiane, pikërisht vendimi për të mos vijuar më bashkëpunimin me grupin e trafikut të drogës dyshohet se e vuri të riun në shënjestër.
Ngjarja e fundit ndodhi më 1 korrik në Mirano, pranë Venecias. Hetuesit dyshojnë se 25-vjeçari, i cili kishte nisur të punonte në kantieret e ndërtimit në Venecia, ishte përballur me presion nga ish-bashkëpunëtorët pasi kishte refuzuar të rikthehej në aktivitetin kriminal. Por përplasja nuk nisi në korrik.
Sipas dosjes së hetimit, muaj më parë situata ishte përshkallëzuar, me të riun dhe partneren e tij që ishin vënë në shënjestër të një tjetër sulmi. Mes fundit të shkurtit dhe fillimit të marsit, persona të armatosur dyshohet se kanë qëlluar në drejtim të çiftit. Për t’i shpëtuar plumbave, 25-vjeçari dhe e dashura e tij u strehuan në rulotën ku jetonin, e vendosur në pronën e babait të vajzës.
Burim: Shekulli — Redaksia ZHURMA