Pse po distancohet diaspora nga politika e Maqedonisë së Veriut?
Miliarda eurosh në dërgesa dhe investime kanë ushqyer ekonominë e vendit për dekada, por partitë e kujtojnë diasporën vetëm sa herë afrohen zgjedhjet.
SHKUP — Ky mund të jetë brezi i fundit i diasporës që voton masivisht në Maqedoninë e Veriut. Brezi i ri, i lindur dhe i rritur në Perëndim, nuk ka të njëjtën lidhje emocionale me politikën vendlindore dhe vështirë se do t'u përgjigjet thirrjeve të politikanëve sa herë afrohen zgjedhjet, sipas Tetova Sot.
Për dekada, diaspora ka qenë shtylla më e fortë e këtij vendi. Ka mbështetur familjet, ka investuar dhe ndërtuar shtëpi e biznese, ka dërguar miliarda euro që mbajnë gjallë ekonominë. Institucionet ndërkombëtare e kanë vlerësuar si faktor i rëndësishëm për ekonominë e vendit.
Por politika e ka kujtuar diasporën vetëm gjatë zgjedhjeve. Respekti ka qenë i përkohshëm, i lidhur me interesin elektoral. Pasi mbyllen kutitë, harrohen njerëzit që erdhën nga mijëra kilometra larg me shpenzimet e tyre. Në Bërvenicë, mobilizimi ishte i madh — mërgimtarë votuan duke besuar se po kontribuonin për ndryshim, më pas panë pazaret politike dhe u ndjenë të mashtruar.
Diaspora nuk kërkon privilegje, por respekt. Kërkon që vota të mos përdoret si mjet për interesa të momentit. Nëse humbet besimi i tyre, humbet jo vetëm vota, por lidhja që për dekada ka mbajtur gjallë familje, ekonomi dhe shpresën se ky vend mund të bëhet më i mirë.
Burim: Tetova Sot
— Redaksia ZHURMA