DHSK mbyll fazën e provave në gjykimin ndaj Thaçit

HAGA — Dhomat e Specializuara të Kosovës (DHSK) në Hagë shpallën se është mbyllur faza e paraqitjes së provave në gjykimin kundër Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit për pengim të administrimit të drejtësisë. Gjykatësi i vetëm Christopher Cosnell lëshoi urdhërin e mbylljes dhe konfirmoi kalendarin e procedurës së ardhshme.

Sipas njoftimit të DHSK-së, 24 gushti 2026 është afati për dosjet gjyqësore përfundimtare, 4 shtatori për dosjet e kundërpërgjigjeve, ndërsa 10, 11 dhe 14 shtatori do të mbahen seancat për deklaratat përmbyllëse. Këto seanca do të jenë publike dhe do të transmetohen, sipas raportit të Sinjalit.

Gjykimi filloi më 27 shkurt 2026, kur të tërë petë të dyshuarit u deklaruan të pafajshëm. Dësmitari i parë, me masa mbrojtëse, dëshmoi deri më 2 mars. Koen Herlaar, ekspert i kriminalistikës në Institutin e Kriminalistikës së Holandës, dëshmoi më 3 dhe 4 mars, ndërsa Christopher Kelly, hetues forenzik digjital, u dëgjua më 4 dhe 5 mars.

Për mbrojtjen e Thaçit dëshmoi Helen Fraser, ekspertja e transkriptimit në fushën e kriminalistikës, më 11 dhe 12 maj 2026. Thaçi gjendet në paraburgim në Hagë që nga nëntori 2020, duke u gjykuar fillimisht për krime lufte dhe krime kundër njerëzimit.

Më 2024 u ngrit aktakuza shtesë për pengim të drejtësisë. Smakaj, Fazliu dhe Kilaj u arrestuan më 5 dhjetor 2024 në Kosovë dhe u transferuan në DHSK më 6 dhjetor. Thaçi mori fletarrestimin në Hagë më 5 dhjetor, ndërsa Kuçi u dorëzua aktakuza e konfirmuar dhe fletëthirrja më 9 dhjetor.

Sipas aktakuzës, Thaçi individualisht dhe përmes tre grupeve — Grupi Fazliu, Grupi Smakaj dhe Grupi Kilaj — ka ndjekur një model sjelljesh për të penguar personat zyrtarë. Akuzohet se anëtarët e këtyre grupeve koordinuan për të ndikuar në dëshmitarët e ZPS-së gjatë vizitave jo të priveligjuara më 2 korrik, 9 shtator dhe 6 tetor 2023.

Ndaj Thaçit rëndojnë tri akuza për pengim të personit zyrtar, tri për shkelje të fshehtësisë së procedurës dhe katër për mosbindje ndaj gjykatës. Kilaj, Smakaj dhe Fazliu akuzohen për tentativë pengimi dhe mosbindje, ndërsa Kuçi për dy akuza mosbindjeje.

Burim: Koha.net
— Redaksia ZHURMA