Si do të zgjidhet problemi i deponisë 11-vjeçare në Debreshtë?
Banorët e Dollnenit përballen me tymin e deponisë në Debreshtë, ndërsa komuna pret deponinë rajonale në Novaci që pritet të jetë gati në vitin 2029.
DEBRESHTË — Banorët e fshatit Debreshtë në Komunën e Dollnenit po përballen çdo ditë me një katastrofë të vërtetë ekologjike që zgjat prej një dekade. Deponia e hapur ka krijuar një vatër të vazhdueshme zjarri dhe tymi të cilat nuk janë ndalur pothuajse asnjëherë që nga viti 2015.
Kjo situatë rëndohet syshe deponia shtrihet skaj rrugës rajonale që lidh Dollnenin me Prilepin dhe Makedonski Brodin. Përveç udhëtarëve të shumtë që detyrohen të ndiejnë aromën e keqe, banorët lokalë janë të pashpresë përballë tymit mbytës që u rrezikon shëndetin.
Kryetari i Komunës së Dollnenit, Blerim Islami, thotë se po përpiqen të gjejnë një zgjidhje afatgjatë për dislokimin e këtij vendgrumbullimi. Ai thekson se janë duke marrë hapa konkretë dhe presin ndërtimin e deponisë rajonale që do të sjellë zgjidhjen e përhershme.
Ky projekt i madh në Novaci të Manastirit do të përfshijë edhe komunat e tjera, ndërsa pika e ngarkim-shkarkimit do të jetë në Prilep. Islami shpreson që ky investim rajonal të përfundojë sa më parë për t'i dhënë fund katastrofës ekologjike.
Megjithatë, deponia e re rajonale nuk pritet të jetë e gatshme para vitit 2029. Pas 11 viteve zvarritje të problemit në Dollnen, banorët do të detyrohen të thithin tymin edhe për të paktën tre vite të tjera.
Burim: TV21
— Redaksia ZHURMA