DAP e Maqedonisë merr kryesimin e IOTA-s

BUDAPEST — Drejtoria e të Ardhurave Publike (DAP) e Maqedonisë mori kryesimin njëvjeçar të Organizatës Ndërevropiane të Administratave Tatimore (IOTA) gjatë Asamblesë së 30-të Vjetore të mbajtur në Budapest. Flamuri i organizatës u dorëzua simbolikisht nga ushtruesja e detyrës së drejtoreshës tatimore të Hungarisë, Csilla Tamás Czinege, te drejtoresha e DAP-it, Elena Petrova, njoftuan nga DAP.

Në fjalimin e saj pas marrjes së kryesimit, Petrova theksoi se administratat tatimore sot përballen me ndryshime të shpejta teknologjike, modele të reja ekonomike dhe pritshmëri gjithnjë e më të mëdha nga qytetarët dhe bizneset. Roli i IOTA-s, sipas Petrovës, është t'i ndihmojë administratat t'i shndërrojnë këto sfida në mundësi — përmes bashkëpunimit praktik, shkëmbimit të përvojave dhe ngritjes së përbashkët të kapaciteteve.

"IOTA nuk duhet të jetë vetëm një vend ku administratat tatimore diskutojnë për ndryshimet, por një vend ku së bashku i shndërrojnë sfidat në zgjidhje konkrete", tha drejtoresha Petrova në fjalimin pas marrjes së kryesimit. Menjëherë pas ceremonisë, ajo udhëhoqi mbledhjen konstituive të Këshillit të ri Ekzekutiv të IOTA-s.

Këshilli i ri Ekzekutiv përfshin tetë shtete: Azerbajxhanin, Belgjikën, Armeninë, Estoninë, Rumaninë, Finlandën, Kroacinë dhe Zvicrën. Petrova mori pjesë gjithashtu në panel diskutimi me drejtorët e administratave tatimore të Azerbajxhanit, Estonisë, Ukrainës, Hungarisë dhe Kroacisë, ku u trajtuan prioritetet strategjike dhe roli i ardhshëm i IOTA-s.

Në qendër të diskutimeve qëndroi nevoja për përshpejtimin e transformimit digjital dhe aftësia e administratave tatimore për të ruajtur besimin e publikut ndaj ndryshimeve teknologjike dhe ekonomike. Në IOTA bëjnë pjesë 43 shtete anëtare evropiane dhe dy anëtare të asociuara; organizata bashkëpunon gjithashtu me institucione ndërkombëtare dhe globale që merren me çështje tatimore.

Burim: TV21
— Redaksia ZHURMA