Daku i thotë lamtumirë Rubin Kazanit me gol e lot

KAZAN — Mirlind Daku luajti ndeshjen e tij të fundit për Rubinin e Kazanit dhe i dha lamtumirën me gol në fitoren 2-1 ndaj Akronit, në javën e dytë të Premier Ligës ruse. Karrierën e vazhdon te Spartaku i Moskës, pas kalimit për 11 milionë euro.

Sulmuesi shqiptar u mallëngjye që përpara ndeshjes, teksa trajneri Artiga shpjegonte taktikën, por kjo nuk e pengoi të jepte maksimumin. Goli ishte i dyti i tij në dy javët e para të kampionatit. Pas fitores, shokët e ekipit e ngritën në ajër, sikur të kishin fituar ndonjë trofe të madh.

Daku shënoi 38 gola dhe shërbeu 13 asistë në 93 ndeshje me fanelën e klubit nga Tatarstani, pothuajse të gjitha në Premier Ligën ruse. Ai ishte udhëheqësi i sulmit, njeriu që disa herë e mbajti vetëm mbi supe ekipin, dhe mungesa e tij do të ndihet.

Në dhomën e zhveshjes, Daku u nda me lot nga shokët me të cilët kaloi tre vjet të jetës, më pranë tyre se sa familjes. Trajneri Artiga e cilësoi hero të Rubinit, me kontribut të madh. Vetë Daku falënderoi klubin për tre vite të shkëlqyera dhe premtoi se nuk do t'i harronte kurrë.

Kontrata me klubin moskovit është trevjeçare, me të drejtë zgjatjeje edhe një sezon dhe rrogë 3.5 milionë euro në vit.

Burim: ABC News
— Redaksia ZHURMA