Çfarë u arrit në takimet e para të Kurtit me opozitën?

PRISHTINË — Nga takimet e para të Albin Kurtit me liderët e opozitës pas certifikimit të zgjedhjeve, nuk doli asnjë marrëveshje konkrete. Kryeministri i ri u takua radhazi me Bedri Hamzën e PDK-së dhe Lumir Abdixhikun e LDK-së, ndërsa Ardian Gjini i Aleancës për Ardhmërinë e Kosovës refuzoi ftesën për t'u takuar me të.

Këto ishin takimet e para mes tyre që nga certifikimi i rezultateve të zgjedhjeve të parakohshme parlamentare të 7 qershorit, ku Lëvizja Vetëvendosje mori 47.13 për qind të votave, përkundrejt 19.44 për qind për PDK-në dhe 16.69 për qind për LDK-në.

Në takimin me kryetarin e PDK-së, Bedri Hamza, Kurti e cilësoi bisedën si të parën dhe konstruktive, të zhvilluar në frymën e vullnetit për t'i dhënë Kosovës institucione të reja. "Aktualisht nuk mund të themi se kemi një rezultat konkret", tha ai.

Vetë Hamza bëri të qartë se PDK-ja do të mbetet parti në opozitë për këtë mandat, por premtoi votë pro për marrëveshjet financiare ndërkombëtare dhe të tjera që kërkojnë shumicën prej dy të tretash. "Ne do të bashkëpunojmë me të gjitha forcat politike, me të gjitha grupet brenda Kuvendit të Kosovës", tha ai.

Ndryshe nga PDK-ja dhe LDK-ja, kryetari i Aleancës për Ardhmërinë e Kosovës, Ardian Gjini, e kishte refuzuar që në krye ftesën për t'u takuar me Kurtin. "Nuk besoj që është në rregull që një parti e respektuar siç është AAK-ja të refuzojë takimin me mua si kryeministër dhe kryetar i partisë fituese", deklaroi Kurti.

Më vonë po të njëjtën ditë, Kurti u takua me kryetarin e LDK-së, Lumir Abdixhiku, i cili ishte i shoqëruar nga Vjosa Osmani. Kryeministri u shpreh optimist, por bëri të ditur se as nga ky takim s'u arrit ndonjë gjë konkrete, duke lënë hapësirë për takime të tjera në vazhdim.

Vetë Abdixhiku e vlerësoi pozitivisht bisedën, duke thënë se u fol "për stabilitetin e domosdoshëm institucional dhe shmangien e domosdoshme të zgjedhjeve të ardhshme, të katërtat me radhë në më pak se një vit e gjysmë". Palët, sipas tij, u dakorduan të vazhdojnë bisedimet e mëtejshme si formë e vetme për t'i shmangur zgjedhjet e reja.

Burim: Klan Kosova
— Redaksia ZHURMA