Çfarë kërkon VLEN-i me nisjen e karvanit të ri nga Dibra?

DIBËR — Pas konsolidimit të koalicionit VLEN në një subjekt të vetëm politik, udhëheqësit Bilall Kasami dhe Izet Mexhiti kanë nisur punën në terren. Ndalesa e tyre e parë ishte qyteti i Dibrës, ku panë nga afër projektet e udhëhequra nga kryetari i komunës Fisnik Mela.

Në këtë vizitë të parë mori pjesë edhe nënkryetarja Mimoza Musa. Delegacioni u përqendrua në projektet zhvillimore që po zbatohen në terren, duke synuar të demonstrojë se koalicioni tashmë po e shndërron vizionin e tij politik në ndryshime reale dhe të prekshme për banorët e kësaj komune.

Fokusi kryesor ishte te ndërtimi i një parkingu të ri publik me 250 vende në qendër të qytetit. Ky projekt kushton rreth 350 mijë euro dhe sipas VLEN-it, ofron një zgjidhje të shpejtë për të rregulluar infrastrukturën urbane dhe për të përmirësuar cilësinë e jetës.

Liderët e VLEN-it theksuan se decentralizimi dhe fuqizimi i komunave mbeten prioritetet e tyre kryesore, në përputhje me Marrëveshjen e Ohrit. Sipas tyre, komuna është dera e parë ku qytetarët kërkojnë zgjidhje për problemet e tyre ditore, prandaj mbështetja lokale është thelbësore.

Krahas parkingut, u përmendën edhe projekte strategjike si nisma “One Stop Shop” në pikat kufitare në Bllatë dhe Qafë Thanë. Kjo nismë do të lehtësojë qarkullimin e njerëzve dhe mallrave, duke forcuar lidhjet ekonomike dhe zhvillimin lokal e rajonal.

Kjo vizitë pason diskutimet se çfarë synon VLEN-i me mbledhjen e aktivit në Gostivar për konsolidimin e strukturave. Përmes investimeve të tilla, koalicioni synon të vërtetojë se qeverisja e përgjegjshme lokale sjell përfitime direkte për komunitetin.

Burim: TV21
— Redaksia ZHURMA