Çfarë kërkon sindikata kundër pensionimit në 72 vjeç?

SHKUP — Lidhja e Sindikatave të Maqedonisë (LSM) kërkon pensionim pas 40 vitesh pune për burrat dhe 35 për gratë, duke refuzuar idenë e daljes në pension në moshën 72-vjeçare. Sindikata vlerëson se kjo masë nuk e zgjidh krizën strukturore të fondeve pensionale, por vetëm përkohësisht do ta mbulojë deficitin.

LSM i referohet të dhënave zyrtare të Entit Shtetëror të Statistikave, sipas të cilave jetëgjatësia mesatare në vend është 76.63 vjet. Sindikata e vë në pikëpyetje idenë e daljes në pension në 72 vjeç, duke pyetur nëse qasja e re do të nënkuptojë punë praktikisht deri në fund të jetës.

Sindikata kërkon fuqizimin e punësimit të të rinjve përmes vendeve reale dhe të qëndrueshme të punës, si rezultat i investimeve të reja vendase ose të huaja dhe i rritjes së pagave. Sipas LSM-së, nevojitet pensionimi i parakohshëm, pensioni i pjesshëm i pleqërisë dhe mundësia për blerjen e viteve të stazhit të punës.

LSM kërkon edhe vendosjen e stazhit të privilegjuar për punëtorët e ndërtimtarisë dhe për sektorë të tjerë ku detyrat e punës kryhen në kushte veçanërisht të vështira. Sipas sindikatës, këto kushte kanë ndikim negativ në jetën dhe shëndetin e punëtorëve dhe duhet të merren parasysh në llogaritjen e stazhit.

Një problem kritik që LSM thekson është puna e padeklaruar, e cila i kushton shtetit 250 milionë euro çdo vit, të ardhura që mbeten në xhepat e punëdhënësve. Nëse këto të ardhura do të legalizoheshin, do ta forconin Fondin e Sigurimit Pensional dhe Invalidor, duke garantuar më mirë mbrojtjen sociale pa zgjatur vitet e punës.

LSM vlerëson se punëtorët nuk mund të detyrohen të punojnë më shumë pa vullnetin e tyre, veçanërisht kur rritet varfëria dhe të rinjtë largohen nga vendi. Propozimi për pensionim në 72 vjeç, sipas sindikatës, është një përpjekje për të shtypur problemin strukturor në vend që ta zgjidhë atë nëpërmjet politikave serioze.

Burim: Shenja
— Redaksia ZHURMA