Çfarë i mohoi Këshilli Prokurorial GLPS-së?

PRISHTINË — Grupi për Studime Juridike dhe Politike (GLPS) njoftoi të premten se Këshilli Prokurorial i Kosovës (KPK) refuzoi t'i japë qasje në fletëpoentimet e kandidatëve për kryeprokuror të shtetit. Sipas GLPS-së, në kërkesën për qasje, KPK-ja ka vendosur të heshtë.

Organizata e vlerëson heshtjen si sinjal negativ për pritshmëritë e publikut ndaj reformës në Këshillin Prokurorial. "Refuzimi i heshtur për të dhënë qasje krijon paqartësi të panevojshme dhe nuk përputhet me pritshmëritë për një institucion kushtetues që synon forcimin e transparencës, llogaridhënies dhe besimit publik," thuhet në reagimin e GLPS-së.

GLPS-ja ka njoftuar se ka dorëzuar ankesë pranë Agjencisë për Informim dhe Privatësi. Qasja në fletëpoentimet, thotë organizata, është e domosdoshme për të verifikuar nëse përzgjedhja e kandidatëve u zhvillua në mënyrë objektive, të paanshme dhe në përputhje me parimin e meritokracisë.

Pesë kandidatët për kryeprokuror të shtetit u intervistuan më 1 korrik. Sipas vlerësimit të panelit, Zejnullah Gashi mori më së shumti pikë, 91.6, i ndjekur nga Atdhe Dema me 89.3, Naim Abazi me 89, Rafet Halimi me 87 dhe Shqipdon Fazliu me 86.5 pikë.

Diferenca mes kandidatit të parë, Gashi, dhe të fundit në renditje, Fazliu, është vetëm 5.1 pikë. Në listën e pesë kandidatëve nuk figuron Blerim Isufaj, kryeprokurori i Speciales, të cilin Këshilli Prokurorial e kishte zgjedhur në konkursin e mëparshëm, rreth tre vjet më parë.

Presidentja e atëhershme, Vjosa Osmani, nuk e dekretoi Isufajn në tetor të 2023-shit, me arsyetimin se ishin regjistruar dhjetëra shkelje në procedurën e përzgjedhjes së atij konkursi. Që nga ajo kohë, institucioni i Kryeprokurorit të Shtetit udhëhiqet nga një ushtrues detyre.

Ankesa e re e GLPS-së pranë Agjencisë për Informim dhe Privatësi vjen pikërisht ndërsa procesi për të zgjedhur titullarin e plotë të postit mbetet, sipas vetë organizatës, i mbyllur ndaj shqyrtimit publik.

Burim: Koha.net
— Redaksia ZHURMA